Ambasada amerikane: Falënderues për partneritetin e fortë dhe të qëndrueshëm me Kosovën

Ambasada amerikane ka falënderuar Kosovën për partneritetin e fortë dhe të qëndrueshëm, në ditën festive të Falënderimeve, që ndryshe njihet si “Thanksgiving”.

“Në këtë Ditë Falënderimi, ne jemi falënderues për partneritetin e fortë dhe të qëndrueshëm ndërmjet Shteteve të Bashkuara dhe Kosovës”, thuhet në një postim të ambasadës në Facebook, përcjell Klankosova.tv.

Dita e Falënderimeve fokusohet në një histori me origjinë amerikane. Në vitin 1621, pelegrinët e rinj në tokë dhe anëtarët e fisit Wampanoag, të cilët i mësuan pelegrinët të rritnin të korrat që u duheshin për të mbijetuar, ndanë atë që konsiderohet vakti i parë i Falënderimeve.

Gjatë shekujve, amerikanët, si njerëzit në vende të tjera, festonin periodikisht kur rendimentet e vjeshtës ishin të bollshme dhe gjithashtu shënuan ditë fetare të “falënderimit” për bekimet në jetën e tyre – si fundi i thatësirës, ​​shërimi nga sëmundjet ose fitorja në betejë.

Në vitin 1863, gjatë presidencës së Linkolnit dhe Luftës Civile, Dita e Falënderimeve u bë një festë kombëtare.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.