Kandidati i AAK-së në Dragash thotë se synon hapjen e fabrikës për prodhim të mishit në Sharr

Kandidati i AAK-së për Dragashin, Agron Gashi, ka prezantuar programin e tij të cilin thotë se e ka hartuar duke u mbështetur në pozitën gjeografike, resurset natyrore dhe problemet e qytetarëve të kësaj komune.

“Kemi për synim zhvillimin e bujqësisë dhe blegtorisë së kësaj komune, bimët aromatike që ndodhen në këtë komunë dhe turizmin. Infrastruktura, arsimi dhe shëndetësia janë marrë si sektorë në vete. Komuna e Sharrit është e njohur me një pozitë gjeografike me lartësi 1100 deri 2500 metra dhe si resurs konsiderohet me 17 % në nivel të Republikës së Kosovës me kullosa. Duke marrë këtë parasysh, ne kemi menduar që kësaj komune t’i japim prioritet me zhvillim të bujqësisë dhe blegtorisë duke shtuar numrin e deleve dhe lopëve qumështore dhe njëkohësisht është definuar edhe nga nivelet më të larta qendrore që kjo komunë ka kapacitet për prodhim të mishit të gjedhit, prandaj do t’i japim prioritet këtij drejtimi duke hapur dyert për investitorë të brendshëm dhe të jashtëm për të ndërtuar një fabrikë të mishit në këtë komunë. Ndërmarrjen aktuale “Sharr Prodhimi” që është një pasuri shoqërore do t’ia kalojmë komunës që t’i japim prioritet këtij drejtimi”.

“Sa i përket bimëve aromatike ekzistojnë 110 lloje të tyre, prandaj mendojmë që edhe në këtë sektor ta hapim një fabrikë për grumbullimin, tharjen dhe paketimin e tyre për t’i dërguar në vendet e BE-së ku janë të kërkuara”, ka thënë ai në “Edicionin Zgjedhor” në Klan Kosova.

Kur ka folur për zhvillimin e ekonomisë, Gashi ka përmendur idenë për hapjen e fabrikës për bimët aromatike dhe farmaceutike.

“Bimët aromatike dhe farmaceutike që gjenden në komunën tonë janë të kërkuara në tregun evropian dhe botëror. Gjatë sezonit veror i kemi dy ose tri pika grumbulluese ku janë regjistruar deri 1 milion e gjysmë para të cilat kanë mundur t’i marrin qytetarët me mbledhjen e këtyre bimëve. Duke marrë parasysh këtë resurs, sepse bjeshkët tona kanë shumë biodiversitet, dhe më e keqja e mundshme është që ne këto bimë i shkelim çdo ditë dhe nuk e dimë rolin, funksionin, cilësinë dhe koston e tyre. Duhet të hapim një zyrë të posaçme me njohës të fushës bimore të cilët do të ligjërojnë dhe do të japin mostra dhe figuracione të ndryshme për këto bimë. Mendoj që ta hap një fabrikë për grumbullim, përpunim, tharje dhe paketim për jashtë vendit”.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.