Zonja e parë e Ukrainës i kërkon Koresë së Jugut pajisje ushtarake jovdekjeprurëse

Zonja e parë e Ukrainës, Olena Zelenska, kërkoi pajisje ushtarake jo-vdekjeprurëse ndërsa u takua me presidentin e Koresë së Jugut, Yoon Suk Yeol, në Seul të martën, sipas një zëdhënësi presidencial.

Zelenska po viziton Seulin si e dërguar presidenciale e Ukrainës. Yoon e përshëndeti atë duke shprehur ngushëllime për viktimat dhe popullin ukrainas, tha zëdhënësi Lee Do-woon.

Zonja e parë i kërkoi Koresë së Jugut të sigurojë pajisje ushtarake jovdekjeprurëse, duke përfshirë detektorë minash, pajisje për çminim dhe automjete të ndihmës së parë. Ajo gjithashtu shprehu shpresën se kompanitë koreano-jugore do të marrin pjesë në procesin e rindërtimit të Ukrainës, tha Lee.

Ajo nuk kërkoi armë vdekjeprurëse dhe tha se i kupton vështirësitë e Koresë së Jugut në ofrimin e tyre në Ukrainë, sipas një zyrtari nga zyra presidenciale, shkruan CNN, përcjell Klankosova.tv

Qëkur shpërtheu lufta në Ukrainë, Koreja e Jugut ka mbajtur me vendosmëri qëndrimin e saj për të mos ofruar armë vdekjeprurëse për një vend ndërluftues.

Yoon, në përgjigje, tha se Koreja e Jugut do të “mbështesë në mënyrë aktive Ukrainën” në bashkëpunim me vendet e NATO-s dhe komunitetin ndërkombëtar, shtoi Lee.

Zelenska gjithashtu u takua veçmas me zonjën e parë të Koresë së Jugut, Kim Keon Hee, e cila vlerësoi përpjekjet “guximtare dhe të përkushtuara” të Zelenska që ajo ka bërë në mes të një lufte, tha Lee.

*Klikoni KËTU për t’u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS