Lajmet e fundit
Zjarri në janar të këtij viti në një kompleks banesor në Emshir, detyroi zjarrfikësit të thyejnë xhamat e kësaj banese.
Muaj më pas, këto dritare mbesin të parregulluara, e banorët ankohen për rrezikshmërinë që po ua sjell një situatë e tillë, transmeton Klankosova.tv.
Mirlind Kasumaj, banor i këtij kompleksi, tregoi në mënyrë kronologjike se si rrodhi e gjithë ngjarja.
“Më datën 16 janar, në garazhet tona ka ndodhur djegia e disa veturave, ku tymi ka kapluar njësitë banesore, garazhet, gjithashtu edhe komunikimin vertikal. Ekipet e shpëtimit, zjarrfikësit, kanë intervenuar duke thyer disa xhama këtu, ku jemi në pajtim të plotë, pasi punën e kanë pasur ashtu. Xhamat kanë mbetur të thyer, pas disa muajve ne kemi shtruar kërkesë në komunën e Prishtinës për vendosjen e xhamave, ku kemi hasur në vesh të shurdhër”, tha ai për emisionin “Fol me Arin”.
Kasumaj thotë se kjo dukuri është shqetësuese, pasi po rrezikohen fëmijët që luajnë në ambiente të jashtme.
