I vë zjarrin banesës së hallës, arrestohet 24-vjeçari në Vlorë

Një 24-vjeçar është arrestuar në Vlorë, pasi dyshohet se i ka vënë zjarrin qëllimisht banesës së hallës së tij.

Ngjarja ka ndodhur më 8 korrik, rreth orës 15:30, në lagjen “Partizani”, njofton policia e shtetit në Facebook. 

Sipas Policisë, pas marrjes së njoftimit, shërbimet e Komisariatit të Vlorës nisën menjëherë hetimet dhe nga pamjet filmike të siguruara në vendngjarje, u bë e mundur identifikimi dhe kapja në flagrancë e autorit të dyshuar, shtetasit E. K., banues në Vlorë.

Ai akuzohet për veprën penale “Shkatërrimi i pronës me zjarr”, transmeton Klankosova.tv. 

Zjarri, që dyshohet të jetë shkaktuar për motive të dobëta, ka shkaktuar vetëm dëme materiale, falë ndërhyrjes në kohë të zjarrfikësve.

Materialet e rastit janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.