Veseli krenar me Sigal Prishtinën

Drejtuesve të ekipit dhe lojtarëve, kryetari Veseli u shprehu respektin për punën dhe rezultatin e jashtëzakonshëm të arritur në këtë garë të rëndësishme sportive.

“Titulli i kampionit të ‘Sigal Prishtinës’ na ka bërë të gjithëve krenarë. Ky trofe, i pari i këtij lloji për ekipe, është me vlerë edhe për analet e historisë së sportit të shtetit tonë”, theksoi kryetari Veseli.

Duke i sjellë Kosovës tituj të tillë, kryetari Veseli, tha se asaj i bëhet një shërbim i madh në përpjekjet për ndërkombëtarizimin e sportit dhe në forcimin e subjektivitetit ndërkombëtar në përgjithësi.

Kreu i Kuvendit tha se rinia e Kosovës duhet të ketë mundësinë për t’u dëshmuar edhe në sport. Kjo mundësi, shtoi ai, duhet të krijohet jo vetëm me investime në palestra e terrene sportive, por edhe në sportin shkollor duke përkrahur talentet, duke promovuar shpirtin e garës dhe jetën e shëndetshme të rinisë së vendit tonë.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.