Vendimi për vizat, Sejdiu: Shtetasit e Kosovës e duan vendin e vet dhe atë nuk e zbrazin

Ish-presidenti Fatmir Sejdiu, e ka quajtur vendim historik për Kosovën, atë të Këshillit të Ministrave të Bashkimit Evropian për liberalizimin e vizave për Kosovën.

“Ky hap i ndërrmarë nga ky mekanizëm evropian është një vlerësim i fuqishëm për atë që Kosova dhe institucionet e saj e kanë dëshmuar me rezultate dhe përmbushje të kritereve të kërkuara, përkundër sfidave të mëdha me të cilat janë përballur. Mundësia e lëvizjes së qytetarëve të vendit në gjithë Zonën Shengen, pa pasur nevojën e furnizimit me viza, në radhë të parë shprehë besimin në njerëzit e vendit tonë se do të respektojnë rregullat që parasheh BE-ja”, është shprehur Sejdiu, transmeton KlanKosova.tv.

Liberalizimi i vizave sipas Sejdiut, nënkupton një hap para të lëvizjes së Kosovës sa përket anëtarësimeve të saj në mekanizmat e rëndësishëm evropianë.

“Është kjo meritë e gjithë gjeneratave që kanë udhëhequr me Kosovën”, ka shtuar ai, derisa ka përmendur se kosovarët nuk do të largohen pas hyrjes së fuqi të vendimit.

“Shtetasit e Kosovës e duan vendin e vet dhe atë nuk e zbrazin”.

Më tej edhe vendimi i pesë vendeve mosnjohëse për të qenë pro është tregues pozitiv.

“Tregon për një konsideratë të re tani për tani në heshtje, të vendeve anëtare të BE-së të cilat ende nuk e kanë njohur Republikën e Kosovës”.

Rrini të informuar mbi zhvillimet kryesore duke u bërë pjesë e komunitetit tonë në Viber

BONUS: Merreni aplikacionin tonë në Android dhe iOS