Të shtëna aksidentale në Mamushë, një person plagoset në këmbë

Një person është plagosur aksidentalisht në këmbë me armë zjarri në Mamushë.

Policia bën të ditur përmes raportit se rasti është raportuar rreth orës 13:50, ku viktima, mashkull kosovar, dyshohet se është plagosur aksidentalisht nga një tjetër mashkull kosovar.

Viktima është dërguar për trajtim mjekësor, ndërsa policia ka sekuestruar një pistoletë, nëntë fishekë dhe nëntë gëzhoja.

I dyshuari është arrestuar dhe, pas intervistimit, me vendim të prokurorit është dërguar në mbajtje. Rasti po hetohet si “Lëndim i rëndë trupor”.