Sulm izraelit në Liban, mes armëpushimit të brishtë

Izraeli ka njoftuar të shtunën se ka goditur disa pika të Hezbollahut në Liban, duke mbajtur situatën të tensionuar në mes të një armëpushimi të brishtë.

Ndërkohë, forcat izraelite vazhdojnë operacionet e tyre intensive në Gaza, me pak shenja për ngadalësim të fushatës ushtarake.

Armëpushimi në Liban, i krijuar këtë javë, i dha fund muajve të tëra sulmesh ajrore dhe luftimesh shkatërruese, por mbetet e paqartë kur rreth një milion njerëz të zhvendosur nga shtëpitë e tyre do të mund të kthehen të sigurt.

Sipas marrëveshjes, forcat izraelite pritet të tërhiqen gradualisht nga jugu i Libanit brenda 60 ditëve, ndërsa luftëtarët e Hezbollahut do të zhvendosen në veri të lumit Litani.

Ushtria izraelite ka deklaruar se ka goditur një pikë në kufirin Liban-Siri që “po përdorej aktivisht” nga Hezbollahu për transportimin e armëve nga Siria në Liban, në atë që e cilësoi si shkelje të marrëveshjes së armëpushimit.

Gjithashtu, Izraeli raportoi se ka sulmuar tre vende të tjera në jug të Libanit, ku militantët ishin parë duke “iu afruar strukturave të Hezbollahut”, duke ngarkuar armë në mjete ose duke kryer “aktivitet terrorist” në një objekt të Hezbollahut. Ushtria izraelite nuk dha më shumë detaje për këto sulme.

Hezbollahu ende nuk ka komentuar për këto sulme, raporton The New York Times, transmeton Klankosova.tv.

Dy objekte të tjera të cilësuara si infrastrukturë e Hezbollahut u goditën nga Izraeli këtë javë, pas hyrjes në fuqi të armëpushimit të mërkurën.

Tensionet mbeten të larta, ndërsa komuniteti ndërkombëtar vëzhgon nga afër zbatimin e marrëveshjes së armëpushimit dhe përpjekjet për të shmangur një përshkallëzim të ri të konfliktit.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.