SpaceX mbledh 75 miliardë dollarë, përgatitet për lansimin më të madh të aksioneve në botë

SpaceX ka mbledhur 75 miliardë dollarë (rreth 56 miliardë paund) nga institucionet financiare, përpara se të bëhet kompani e tregtuar publikisht të premten, në atë që pritet të jetë listimi më i madh në historinë e tregjeve të aksioneve.

Në një njoftim drejtuar Komisionit Amerikan të Letrave me Vlerë dhe Bursave (SEC), kompania e eksplorimit hapësinor dhe inteligjencës artificiale tha se ka shitur aksione me vlerë 75 miliardë dollarë, me çmim 135 dollarë për aksion.

Ky çmim përputhet me vlerësimin që SpaceX kishte dhënë javën e kaluar, duke e çuar vlerën e pritshme të kompanisë në rreth 1.8 trilion dollarë, shkruan BBC, transmeton Klankosova.tv.

Në këtë vlerësim, shefi ekzekutiv Elon Musk, i cili tashmë është njeriu më i pasur në botë, pritet të bëhet personi i parë në botë me pasuri mbi një trilion dollarë.

Pasi aksionet të fillojnë të tregtohen, vlera e tyre mund të rritet ose të ulet, varësisht nga numri i aksioneve që do të dalin në shitje gjatë ofertës fillestare publike (IPO) dhe nga kërkesa e investitorëve.

Nëse aksionet e kompanisë shiten me ose mbi 135 dollarë kur tregtimi hapet të premten, SpaceX do të bëhet menjëherë një nga kompanitë më të vlefshme publike në botë.

Megjithatë, në fund janë investitorët ata që vendosin nëse çmimi i aksioneve është i justifikuar apo jo.