Së shpejti caktohet vija kufitare me Malin e Zi

Së fundmi kryeministri, Isa Mustafa ka theksuar se Komisioni Kosovar Shtetëror për shënimin e kufirit me Malin e Zi ka përfunduar punët, por sipas tij  janë edhe disa çështje që kanë mbetur për t`u sqaruar me Komunën e Pejës dhe banorët e atyre tokave ku do të përcaktohet vija e përhershme kufitare, raporton Evropa e Lirë.

Rreth shënimit të vijës kufitare me Malin e Zi, për disa kilometra kontestuese, ka pasur reagime dhe pakënaqësi nga pronaret e atyre tokave ku do të përcaktohet vija e përhershme kufitare.

Ali Lajçi, kryetar i Komisionit Komunal për ketë çështje, i cili thotë se është emëruar nga kryetari i Pejës, Gazmend Muhaxhiri, konsideron se lidhur me punën e deritanishme për shënimin e vijës ndarëse të kufirit me Malin e Zi, janë bërë shkelje të mëdha.

Ndërsa, , kryetari i Komisionit Shtetëror për Shënimin e Kufirit me Malin e Zi,Murat Meha, tha për Radion Evropa e Lirë, se procesi për shënimin e vijës kufitare është duke shkuar pa problem.
Sipas tij, kufiri i vitit 1974, shpallja e pavarësisë së Kosovës dhe Pakoja e Ahtisarit, janë pjesë përbërëse e vendimmarrjes për vijën kufitare.