Rusia e dënon aleatin e Navalnyt me 18 vjet burg

Kritiku i Kremlinit, Leonid Volkov, një aleat i udhëheqësit të ndjerë të opozitës ruse Alexei Navalny, u dënua të mërkurën me 18 vjet burg, ndonëse nuk ishte i pranishëm në gjykatë,.

Dënimi u dha nga një gjykatë ushtarake ruse që e shpalli Volkovin fajtor për dhjetëra akuza, duke përfshirë përhapjen e lajmeve të rreme në lidhje me luftën në Ukrainë dhe “justifikimin e terrorizmit”.

Volkov, i cili jeton në Lituani, e kritikoi ashpër vendimin, duke e përshkruar gjobën prej 2 milionë rublash apo 25,400 dollarë si një shuplakë fytyre. “Dhe nuk më ndaluan të përdor internetin! Epo, do ta përdor atëherë”, shkroi ai në rrjetet sociale.

Në një postim të mëvonshëm, ai e korrigjoi veten dhe tha, pasi lexoi vendimin e plotë, se në fakt i ishte ndaluar përdorimi i internetit për 10 vjet.

“Dhe unë tashmë kam filluar ta përdor. Dreq. Çfarë duhet të bëj?”, shkroi ai me ironi.

Navalny, kritiku më i shquar vendas i presidentit rus Vladimir Putin, vdiq papritur në shkurt të vitit 2024. Ai kishte vuajtur dënime me burg që arrinin në total më shumë se 30 vjet për mashtrim, ekstremizëm dhe akuza të tjera që ai tha se ishin të sajuara për ta heshtur.

Autoritetet e cilësuan lëvizjen e tij si “ekstremiste”, duke e cilësuar atë si një organ të mbështetur nga Perëndimi të vendosur për të nxitur trazira dhe revolucion.

Pavarësisht vdekjes së Navalny-t, hetuesit kanë vazhduar të ngrenë çështje të reja kundër mbështetësve dhe bashkëpunëtorëve të tij, shumë prej të cilëve janë cilësuar si “agjentë të huaj” ose ekstremistë.

Në janar, tre avokatë që kishin punuar për Navalny-n u shpallën fajtorë për përkatësi në një grup ekstremist dhe u dënuan me deri në 5 vjet e gjysmë burgim.

Në prill, katër gazetarë u dënuan me 5 vjet e gjysmë burgim secili, pasi u shpallën fajtorë për punë për organizatën e ndaluar të Navalny-t, shkruan Reuters, transmeton Klankosova.tv.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.