Rritet presioni në depozitat 7 tonëshe të amoniakut në Llamkos

Depozitat e amoniakut që gjenden në fabrikën e falimentuar Llamkos në Vushtrri kanë filluar të paraqesin rrezik për banorët që jetojnë në afërsi të saj.

Ngritja e temperaturave ka shkaktuar edhe rritjen e presionit nga 3 në 9 Bar, brenda depozitës së mbushur me 7 tonë amoniak.

Gjatë ditës së sotme zjarrfikësit kanë dalë në vendin e ngjarjes dhe kanë filluar ta bëjnë ftohjen e rezervuarëve të amoniakut.

Drejtori i Drejtorisë për Mbrojtje dhe Shpëtim në Komunën e Vushtrrisë, Nezir Klinaku, i ka thënë gazetarit të Klan Kosovës, Vullnet Krasniqit, se gjatë gjithë ditës kanë monitoruar situatën në terren, ndërsa presioni i depozitës ka rënë në 7 Bar dhe vazhdon të jetë në rënie.

Sipas Klinakut, deri tek kjo gjendje ka ardhur pasi KEDS-i muaj më parë ia kanë shkëputur energjinë elektrike fabrikës që tashmë është shpallur e falimentuar nga AKP, transmeton Klan Kosova.

Kjo gjë ka bërë që ftohësit e depozitës së amoniakut të mos jenë aktivë.

Klinaku gjithashtu ka thënë se gjatë gjithë ditës kanë tentuar të kontaktojë me administratorin falimentues i cili kujdeset për këtë fabrikë, Virtyt Ibrahimagën, mirëpo në gjë e tillë ka qenë e pamundur.

Ndërkohë, monitorimi i situatës ka vazhduar gjatë ditës për t’i siguruar banorët që jetojnë në afërsi të fabrikës.

klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.