Procesi integrimit, presion për reformim

Ministri i Drejtësisë, Hajredin Kuçi, duke folur në  konferencën gjithëpërfshirëse mbi rolin e Kuvendit në procesin e Integrimit Evropian, ka thënë se rruga drejt integrimit është një lloj mjeti i presionit për reformim të shoqërisë, transmeton Klan Kosova.

“Nënshkrimi i marrëveshjes për Stabilizim Asociim, jo vetëm që hap rrugë në drejtimin e marrëdhënieve kontraktuale, në raport me Unionin Europian, por i definon qartë përgjegjësit dhe detyrat të cilat duhet t’i kryej secili prej nesh”.

Gjatë konferencës, Kuçi informoi të pranishmit lidhur me zhvillimet në fushën e sundimit të ligjit dhe reformat e ndërmarra me qëllim të konsolidimit të infrastrukturës ligjore dhe ngritjes së kapaciteteve njerëzore.

Ai tha se, gjatë hartimit të ligjeve, kanë qenë në harmoni të plotë me Zyrën e BE-së në Kosovë dhe EULEX-in.

“Sa i takon ligjeve të cilat kanë të bëjnë me drejtësinë, kemi pasur parasysh katër faktor të rëndësishëm: Pavarësinë, paanshmërinë, profesionalizmin dhe efikasitetin. Ju them me bindje të plotë se nuk ka ligje në rajon që pavarësinë e gjyqësorit e garanton me shumë se në vendin tonë”

“Mirëpo problemi qëndron te efikasiteti” tha Kuçi.

Gjithashtu Ministri Kuçi i ka njoftuar të pranishmit lidhur me kërkesën që të themelohet një departament pranë Gjykatës Themelore në Prishtinë, për çështjet ekonomike, i cili ka të bëjë me investimet e huaja.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.