Partitë opozitare: Bllok-tarifa do të kundërshtohet me mekanizma ligjorë

Partitë opozitare: Bllok-tarifa do të kundërshtohet me mekanizma ligjorë

NULL NULL
4 months më parë

Të tri partitë opozitare në vend, PDK, LDK dhe AAK, kanë lëshuar sallën e kuvendit, pasi nuk patën vota të mjaftueshme që ta votojnë rezolutën që kundërshtonte rritjen e çmimit të energjisë në vend.

Pas lëshimit të sallës, të tri partitë mbajtën konferencë për media, ku ripërsëritën qëndrimet e tyre, teksa thanë se bllok-tarifat sapo të hyjnë në fuqi do të kundërshtohen me mekanizma ligjorë.

Shefi i grupit parlamentar të PDK-së, Abelard Tahiri, akuzoi kryeministrin e vendit, Albin Kurtin, se është bërë bashkë me ZRRE-në që ta implementojnë një bllok-tarifë që, sipas tij, është e papërballueshme për jetën e qytetarëve të Kosovës.

“Kjo mazhorancë e dha një mesazh të qartë se këtu ka një koordinim të plotë mes Kurtit, ZRRE-së dhe grupit parlamentar të VV-së. Këto tri institucione janë bërë bashkë që ta implementojnë një bllok-tarifë që është e papërballueshme për jetën e qytetarëve të Kosovës”.

“Duket qartë se mazhoranca është pro rritjes së çmimit të energjisë elektrike me tarifa të papërballueshme, ndërsa nga sot e tutje ne duhet t’i provojmë të gjithë mekanizmat tanë ligjorë, kushtetues, juridik e çkado tjetër për të përballuar një gjë të tillë”, ka thënë Tahiri, njofton Klankosova.tv.

Qëndrim të njëjtë shprehu edhe deputeti i LDK-së, Armend Zemaj, i cili tha se veprimet e opozitës janë të ligjshme për të parandaluar një të keqe, që sipas tij, po i pret qytetarët e Kosovës, pa asnjë shpjegim ose mundësi për të kërkuar alternativa efikase që ta përballojnë këtë gjendje.

Më tej, ai tha se qeveria e tanishme e ka edhe mbështetjen e Listës Serbe dhe se nuk mund të bëhen pjesë e një loje të tillë.

“Ne nuk mund të bëhemi pjesë e kësaj loje, përkundër numrave që i kanë të plotë, e edhe mbështetjen që e kanë nga Lista Serbe. Ju e patë që në raportin e djeshëm, katër komunat veriore përjashtohen nga kjo rritje dhe kjo është fytyra e vërtetë e kësaj qeverie”, ka thënë Zemaj, njofton Klankosova.tv.

Kurse, Besnik Tahiri, i bëri thirrje kryeministrit Kurti që, sipas tij, të mos ikë prej përgjegjësisë, duke thënë se çdo i dyti shqiptar e ka votuar VV-në dhe mosmarrja pjesë në votim, e dështoi rezolutën që, sipas tij, në rastin më të keq e kishte ndihmuar qeverinë e ZRRE-në të mos rritën çmimet.

“Secili shqiptar i dytë e ka votuar VV-në dhe mosmarrja pjesë në votim realisht e dështoi rezolutën që, në rastin më të keq, e kishte ndihmuar edhe ZRRE-në edhe qeverinë të mos rriten çmimet e energjisë, sepse rezoluta është vetëm rekomanduese”.

“Albin Kurti, populli të ka votuar për të krijuar zgjidhje, mos ik prej përgjegjësisë. Besimi është i shenjtë, por është vështirë ta mbash. Mos krijo zgjidhje duke rënduar qytetarin e Kosovës, por zgjidhje duke ia lehtësuar dhe përballur me një krizë të jashtëzakonshme”, ka thënë Tahiri, njofton Klankosova.tv