Pacolli Kurtit për pikturat e vendosura në hollin e Kuvendit: Pse nuk i zbulon ato murale të bukura

Kryetari i Aleancës Kosova e Re i është drejtuar kryeministrit të Kosovës, Albin Kurti, për pikturat e vendosura në hollin e Kuvendit.

Ai, në llogarinë e tij në rrjetin social Facebook, tha se ato po vazhdojnë të jenë të mbuluara, përkundër që kryeministri, sa ishte në opozitë, sipas tij në mënyrë demonstrative i pati zbuluar.

“Pikturat e vendosura në hollin e Kuvendit të Kosovës, pjesë e donacionit tim Kuvendit të Kosovës, paraqesin krenarinë tonë kombëtare. Ato vazhdojnë të jenë të mbuluara, përkundër që kryeministri, sa ishte në opozitë, në mënyrë demonstrative, i pati zbuluar”, u shpreh ai.

Tutje, Pacolli tha se nuk e kupton pse nuk po zbulohen ato murale, përcjell Klankosova.tv.

“Sot, që është në pushtet, s’po e kuptoj pse nuk i zbulon ato murale të bukura. Zbuloni pikturat kryeminister apo nuk ju intereson më e kjo lë të kuptojmë se veprimi i atëherëshem ishte vetëm për fushatë? Ta shohim”, ka shkruar Pacolli.