Osmani takon Komandantin e KFOR-it: Të shmangen situatat si e Karaçevës, qytetarët të ndihen të sigurt

Osmani takon Komandantin e KFOR-it: Të shmangen situatat si e Karaçevës, qytetarët të ndihen të sigurt

2 muaj më parë

Kryetarja e Kuvendit të Kosovës, Vjosa Osmani, e ka takuar Komandantin e KFOR-it, Michele Risi, me të cilin ka diskutuar për aspekte të sigurisë në vend dhe ndihmën që KFOR-i mund të japë në menaxhimin e pandemisë COVID-19.

“Kryetarja Osmani u njoftua me gatishmërinë e strukturave të NATO-s, përkatësisht të misionit të saj në Kosovë, për t’u dalë në ndihmë qytetarëve dhe institucioneve të vendit në menaxhimin e pandemisë Covid-19”, thuhet në kumtesë, transmeton Klan Kosova.

“Gjeneral Risi shprehu gatishmërinë e strukturës që ai e udhëheq që KFOR-i të ofrojë të gjitha kapacitetet e nevojshme për ndihmë popullit dhe institucioneve të Kosovës për menaxhimin e kësaj pandemie”.

Po kështu, me gjeneral Risin kryetarja Osmani diskutoi edhe për rolin e KFOR-it në ofrimin e sigurisë për qytetarët e vendit.

“Kryetarja Osmani tha se, si udhëheqëse e Kuvendit dhe përfaqësuese e popullit, e çmon jashtëzakonisht lart gatishmërinë e KFOR-it për të siguruar ambient të qetë dhe të sigurt, por kërkoi po kështu që bashkëpunimi i kësaj strukture ushtarake të thellohet me institucionet e sigurisë të Kosovës, në mënyrë që qytetarët e vendit të ndihen të sigurt dhe që të shmangen situatat, sikur ajo e Karaçevës, të cilat mund të ndikojnë që qytetarët e vendit të mos ndihen të sigurt”.

“Kosova i ka të përcaktuar kufijtë e saj që nga 17 shkurti i vitit 2008 dhe qytetarët e vendit duhet të ndihen të sigurt në çdo cep të vendit”, është shprehur Osmani.