14:12, 27 Janar 2020

Gjykata Themelore në Pejë – Departamenti për Krime të Rënda, ka aprovuar kërkesën e Prokurorisë Themelore në këtë qytet për caktimin e masës së paraburgimit prej një muaji për të pandehurin A.T, për shkak të dyshimit se më 23 janar në Klinë në shtëpinë e tij ka tentuar ta privojë nga jeta gruan e tij.

“Më datë 23.01.2020, rreth orës 16:30, në Klinë, pikërisht në shtëpinë e tij, tenton ta privojë nga jeta gruan e tij, në atë mënyrë që pas disa mosmarrëveshjeve të vazhdueshme që të njëjtit kishin mes vete, ditën kritike, i pandehuri duke qenë edhe nën ndikimin e alkoolit, fillimisht e godet gruan e tij me shuplaka dhe grushte, në kokë dhe trup duke i shkaktuar lëndime dhe duke i thyer gishtin e mesëm të dorës së majtë, e me pas e mbërthen në fyt me lidhësen e xhemperit që ajo e kishte veshur duke e shtrënguar dhe duke i thënë se “kom metë mbyt dhe e di se për këtë do të shkoj në burg” mirëpo, në ato momente kishte ndërhyrë djali i tyre i cili arrin ta largojë të atin ndërsa viktima ik nga shtëpia për të kërkuar ndihme, me ç’rast edhe e lajmëron rastin në polici.

Me këto veprime i pandehuri A.T kishte për të kryer veprën penale vrasje e rëndë e mbetur në tentativë, transmeton Klan Kosova.

Kundër këtij vendimi pala e pakënaqur ka të drejtë ankese në Gjykatën e Apelit.

 

 

Konkurs Pune

Lexo më shumë