Në fundjavë fillon gara në Superligën e hendbollistëve

Në fundjavë zhvillohen ndeshjet e xhiros së 15-të të Superligës së Kosovës në hendboll (meshkujt). Është xhiroja e parë e pjesës së dytë të kampionatit, përkatësisht për këtë vit.

Shumica e klubeve kanë bërë hapa gjigantë sa i takon organizimit dhe kështu me të drejtë pritet garë e fortë e interesante. Pritet që në Superligë të zhvillohet gara më e fortë për pozitat e para në vitet e fundit.

Faza përgatitore e skuadrave, ndeshjet miqësore, organizimi, lojtarët e angazhuar, numri i konsiderueshëm i lojtarëve të huaj, janë shenja pozitive në prag të vazhdimit të kampionatit.

Kanë mbetur të zhvillohen edhe katër xhiro e më pas Superliga ndahet në Superligën A dhe në Superligën B. Në Superligën A gjashtë skuadrat e para luftojnë për titull të kampionit.