Ndeshja Poloni-Holandë në Hamburg, policia qëllon një burrë që dyshohet se kërcënoi me sëpatë

Policia gjermane tha të dielën se qëlluan dhe plagosën një burrë që po kërcënonte me sëpatë dhe një mjet shpërthyes në qytetin verior të Hamburgut, disa orë para se të zhvillohej ndeshja Poloni-Holandë në kuadër të “Euro 2024”.

Oficerët e policisë hapën zjarr pasi burri nuk pranoi të shtrinte sëpatën, duke e goditur në këmbë, njoftoi agjencia gjermane e lajmeve dpa, duke cituar policinë e Hamburgut.

Mediat gjermane publikuan pamjet e një personi të shtrirë në rrugë i rrethuar nga mjekë ndihmës dhe oficerë policie.

Incidenti ndodhi në zonën e qendrës së Shën Paulit të qytetit port verior, i cili ishte i mbushur me tifozë përpara ndeshjes së futbollit të së dielës midis Holandës dhe Polonisë.

Zëdhënësi i policisë tha se nuk kishte asnjë indikacion fillestar se incidenti kishte lidhje me lojën e futbollit, raporton Associated Press, transmeton Klankosova.tv.

Autoritetet gjermane kanë vënë policinë në gatishmëri të lartë gjatë kampionatit evropian i cili filloi të premten dhe zgjat deri më 14 korrik, nga frika e dhunës së mundshme të tifozëve dhe sulmeve terroriste.

Të premten, policia qëlloi për vdekje një burrë afgan pasi ai sulmoi për vdekje një bashkatdhetar dhe më vonë plagosi tre persona që ndiqnin ndeshjen televizive midis Gjermanisë dhe Skocisë në një qytet në Gjermaninë lindore. Policia tha të dielën se motivi i atij sulmi ishte ende i paqartë.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.