Muriqi nga Spanja mbështet Lirinë: S’kam dyshim që do inkuadrohet në Superligë (VIDEO)

Liria do ta zhvillojë njërën prej ndeshjeve më të rëndësishme në histori të klubit, të dielën ndaj Ferizajt, në kuadër të barazhit.

Takimi do të zhvillohet në stadiumin e Podujevës “Zahir Pajaziti”, duke filluar nga ora 15:00.

Prizrenasit kanë paralajmëruar udhëtim masiv me rreth 20 autobusë për ta bërë hapin tjetër – ngjitjen në Superligën e Kosovës.

Përkrahje Liria ka marr edhe nga Spanja, ku ish-futbollisti i këtij ekipi Vedat Muriqi, u ka dërguar një mesazh motivimi.

Muriqi tha se është i bindur që Liria do të inkuadrohet në Superligë.

“Ju përgëzoj për të gjitha sukseset deri më sot, Por na ka mbetur edhe një hap i vogël për të hyrë në Superligë të Kosovës. Ju uroj shumë suksese në ndeshjen e barazhit. Nuk kam kurrfarë dyshimi se do kalojmë barazhin dhe do hyjmë në Superligën e Kosovës”, ka theksuar Muriqi.

Ndërkohë, ish-kapiteni i Kosovës, Anel Rashkaj, që hapat e parë i bëri te Liria, poashtu kërkoi nga futbollistët të kapin rastin e skuadrën ta kthejnë në Superligë.

“Klubi i shtetit tonë të bukur, Prizreni, Liria, është në prag të një ndeshje të rëndësishme, ftoj të gjithë dashamirët e futbollit të përkrahin klubin në mënyrë masive në mënyrë që të ndihmojë Lirinë që të hyjë në Superligë, aty ku e ka vendin”, tha Rashkaj./Klankosova.tv.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.