Miratohet projektligji për përgjimin e telekomunikimeve

Kuvendi ka miratuar në parim projektligjin për përgjimin e telekomunikimeve me 60 vota për dhe asnjë kundër.

Ministri për Integrime Europiane, Bekim Çollaku, ka shpalosur projektligjin për përgjimin e telekomunikimeve, në seancën e sotme parlamentare.

“Ligji përcakton edhe procedurat të operatoreve të rrjetit, ligji është shqyrtuar në bazë të kritereve të Bashkimit Evropian. Përgjim i ligjshëm llogaritet vetëm kur bëhet me urdhër nga gjykata, kur shtjerrën mundësitë tjera. Ky ligj siguron edhe mbrojtjen e të drejtave të gazetarëve dhe mbrojtjen e privatësisë”, ka thënë Çollaku në prezantimin e projektligjit, transmeton Klan Kosova,

Ministri Çollaku tha se për hartimin e këtij projektligji ka ndihmuar shumë edhe shoqëria civile, kurse i ftoi deputetët që ta votojnë në parim atë.

Deputeti i Lëvizjes Vetëvendosje, Ilir Deda, e ka vlerësuar projektligjin pozitivisht dhe ka bërë me dije se Vetëvendosje do të votojë për.

“Ky ligj i merr parasysh standardet më të larta evropiane për mbrojtjen e të drejtave të gazetarëve dhe privatësisë së qytetarëve. Lëvizja VV është pro leximit të parë, do ta votojë pro dhe do të punojë në amandamentimin e tij”, tha Deda, transmeton Klan Kosova.

Projektligji është vlerësuar pozitivisht nga të gjitha grupet parlamentare.