LDK: Skandaloz vendimi i PZAP për Dragashin, do të ankohemi në Supreme e në rast nevoje edhe në Kushtetuese

Lidhja Demokratike e Kosovës e ka quajtur skandaloz  vendimin e PZAP për anulimin e votave me postë për Komunën e Dragashit.

Sipas tyre i gjithë procesi ka qenë i rregullt dhe i ligjshëm, transmeton Klankosova.tv.

“Sot, PZAP morri vendim skandaloz e të paprecedentë në sistemin zgjedhor të Kosovës. Anuloi të gjitha votat e mërgatës – të gjitha pa përjashtim – në rastin e Dragashit. Me këtë vendim, si asnjëherë më parë, duke i anuluar në bllok votat e njerëzve tanë, PZAP tenton të ndryshojë vullnetin qytetar”, thuhet në kumtesë, transmeton Klankosova.tv.

“Lidhja Demokratike e Kosovës, vlerëson se gjithë procesi i regjistrimit dhe votimit të qytetarëve tanë nga jashtë vendit, bazuar edhe në vendimet e KQZ-së, është zhvilluar brenda afateve dhe në përputhje të plotë me dispozitat ligjore dhe rregullat e Komisionit Qendror të Zgjedhjeve”.

“Prandaj, ky proces, procesi i votimit përmes postës, nuk është kontestuar në asnjë fazë të zhvillimit të tij nga askush dhe është vlerësuar plotësisht i ligjshëm edhe nga Komisioni Qendror i Zgjedhjeve i cili ka proceduar me pranimin, verifikimin dhe numërimin e këtyre votave në përputhje me procedurat e parapara ligjore. Kujtojmë se të njëjtat vota ishin pranuar e certifikuar në raund të pare.

LDK ka njoftuar se do të ankohet në Gjykatën Supreme dhe pastaj nëse është e nevojshme edhe në Gjykatën Kushtetuese.

“Betejat politike të fituara me votë s’mund të transferohen në tavolinë.  Duam të besojmë se Supremja do të korrigjojë këtë skandal të ri në vend”.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.