Kosova nuk i ka gati kriteret për viza

Presidentja e vendit, Atifete Jahjaga, ka mbledhur sot Këshillin Kombëtar për Integrime Evropiane.

Në takim ishin të pranishëm  kryeministri Isa Mustafa, kryekuvendari Kadri Veseli, ministri i Integrimeve Evropiane,Bekim Çollaku dhe përfaqësuesi i BE-së në Kosovë, Samuel Zhbogar, u theksua se ka ende punë për të plotësuar kriteret e kërkuara nga Bashkimi Evropian për procesin e liberalizimit të vizave.

Me këtë rast, Jahjaga kërkoi  angazhim shtesë për të përmbushur kriteret e mbetura për liberalizimin  siç janë forcimi i  sundimit të rendit e ligjit dhe luftimi  i  korrupsionit.

Ndërkaq, Kryeparlamentari  Veseli tha se do të angazhohen edhe më shumë për miratimin e ligjeve që dalin si obligim nga bashkësia ndërkombëtare.

Ky i fundit e vlerësoi lart edhe miratimin e MSA-së.

Edhe kryeministri Mustafa tha se po punojnë që deri në fund të majit ta dorzojnë raportin final për kriteret e përmbushura të Kosovës.

Nga ana tjetër,  përfaqësuesi i BE-së në Kosovë, Samuel Zhbogar potencoi se Kosova ka nevojë urgjente për miratimin e 8 ligjeve që janë kusht për integrime evropiane si dhe riatdhesimin e qytetarëve që ilegalisht kanë migruar për në vendet e BE-së.