Rugova ishte pacifisti i përkryem

1.

Ne ditën e sotme para 33 vjetesh âsht themelu Lidhja Demokratike e Kosovës, partia e parë demokratike në Ballkanin Perëndimor dhe nji pasardhëse historike dhe ideore e Nacional Demokratikes Shqiptare dhe Lëvizjës çlirimtare të Kosovës, që lindi si pasojë e shpërbamjës së Jugosllavisë federale dhe si reaksion ndaj fashizmit serb, që ishte në ekspansion dhe për me e plotësu hapësinen pluraliste të mbetun bosh nga shkapërderdhja e Lidhjës së Komunistave kosovarë.

Kjo lëvizje e nxori në krye liberalin e humanistin Brahim Rugova, kritikun letrar dhe studjuesin e Pjetër Bogdanit.

2.

Rugova, të cilit i besonte bota demokratike dhe politikan që e bâni botnore lëngatën e popullit të tina.

I krahasueshem shpesh me Mahatma Gandhin, ai e dha nji shembull unik për botën demokratike: Rezistencën në jodhunë.

Rugova ishte pacifisti i përkryem.

Tek idetë e tij shohim bërthamën e mendimit politik të shqiptarëve të Kosovës dhe pararendjen e një lëvizjeje të madhe shoqnore, që i priu ndërtimit të shtetit të Kosovës.

Pa këtë lëvizje paqësore, Kosova kish me qenë vështirë e kuptueshme nga bota demokratike dhe lufta për liri e popullit tonë nuk do të merrte mbështetjen e aleatëve.

Kontributi madhor i Dr. Rugovës ishte rreshtimi i tij pamëdyshje me Perëndimin, së dyti vinte demokracia si rend shoqnor dhe postulati i tretë i tij ishte ideja e nji Republike t’mosvarme për Kosovën.

Ai âsht kreator i miqësisë së përhershme me ShBA-në.

Rugova ishte nacionalist racional. Kur populli ynë vuante nën shtypje dhe pothuajse po i shuheshin shpresat me u ringritë, ai besonte tek NATO-ja si nji mburojë për Kosovën.

M’pat thânë me 1994 në mënyrë profetike – në nji intervistë për javoren politike “Zëri” – se NATO ka me na mbrojtë!

Rugovën e shquente njerëzorja dhe falja. Pra edhe ka bâ gabime, por jo nga ato që kushin me e dâmtue kursin e çlirimit të vendit, e sidomos nuk bâni gabime në sjeljën e tij me miqtë e Kosovës.

Mirënjohës dhe i përulun ndaj vlerave Perëndimore, Rugova fitoi mbështetje deri në adhurim!

Dhe lutej për njerëzit e tij: Zot falna njohjen!

3.

Kam qenë nënshkrues i Konventës së parë themeltare të LDK, me numër rendor 73.

Padyshim parti historike, që emancipoi politikisht shoqninë kosovare, tue ndikue edhe tek Lëvizja Popullore e Kosovës (LPK) për me e kuptu demokracinë si domosdoshmëni dhe votën e lirë si i vetmi mekanizëm për me e legjitimu pushtetin;

LDK artikuloi kërkesat e shqiptarëve të Kosovës pas ramjës së Murit të Berlinit.

33-vjet ma vonë, partia e Rugovës, mbetët parti kosovacentriste, që projektin e Kosovës shtet e mbanë si të përhershëm e t’pakthyeshëm;

Ndonëse e ruen për vete aurën institucionaliste, idetë politike i ka ndjeshëm t’shterueme, tue mos i dhânë mâ shtysa reformatore shoqnisë kosovare.

LDK në drejtimin e Lumir Abdixhikut, âsht tue kërku kauzat e saj të reja që u përshtatën dimensioneve tjera të lirisë, drejt modernizimit të vetës e maturimit të shtetit.