Faleminderit kolegë!

Dy ditët e kaluara ishin të rënda për Klanin. Televizioni më i madh në vend është njoftuar nga Agjencia e Regjistrimit të Bizneseve, e cila vepron në kuadër të Ministrisë së Tregtisë dhe Industrisë se do t’i hiqet certifikata e biznesit.

Ky njoftim është marrë me shqetësim nga Klan Kosova. Po jo vetëm nga televizioni. Vendimi i ARBK-së është parë si joligjor, i padrejtë, i paprecedentë dhe i rrezikshëm për lirinë e shprehjes e demokracinë edhe nga shumë gazetarë, organizata mediatike vendore dhe ndërkombëtare, shoqata të mbrojtjes së lirisë së shprehjes, politikanë kosovarë e të huaj, misione të ndryshme që suportojnë demokracinë dhe medien e lirë, por edhe ambasada e ambasadorë.

Të gjithë këta e këto i kanë ofruar mbështetje të pakushtëzuar Klanit dhe njëkohësisht të drejtës për liri të medies dhe liri të shprehjes.

Masive ishte edhe përkrahja e shikuesve, lexuesve, dëgjuesve dhe qytetarëve jo vetëm në Kosovë, por gjithandej ku flitet shqip. E paprecedentë për të mirë ishte mbështetja që Klan Kosovës i dhanë shumica dërmuese e mediave vendore, duke përfshirë këtu portale e televizione. Këto të fundit, bënë diçka që ndodh rrallë dukë vendosur logon e Klan Kosovës në ekranet dhe ballinat e tyre.

Kjo i ka bërë ata që punojnë në Klan të ndihen shumë mirë dhe ta kuptojnë se nuk janë vetëm në këtë sfidë të rëndë. Prandaj, gjithsecili në Klan, e falënderon me zemër, gjithsecilin medium që na u gjend afër në këtë situatë. /Klankosova.tv

Rrini të informuar mbi zhvillimet kryesore duke u bërë pjesë e komunitetit tonë në Viber

BONUS: Merreni aplikacionin tonë në Android dhe iOS

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.