Bota mund ta shohë që Biden ka mbaruar, pse Demokratët s’munden?

A mund të ketë diçka më të dëmshme për mundësitë e një kandidati zgjedhjesh sesa rastet e shumta ligjore me të cilat po përballet Donald Trump?

Po, sikurse rezulton: një vendim që ju kursen nga turpërimi dhe shqetësimi i paraqitjes në gjykatë, por e bën këtë duke u bazuar në faktin se nuk jeni të aftë për t’u përballur me gjyqin. Joe Biden është shkatërruar plotësisht nga konkluza e këshilltarit special që po shqyrton mbajtjen nga ana e tij të dokumenteve të klasifikuara nga koha e tij si zëvendëspresident. Ai mund t’u mbijetonte fotografive të gropës së mbeturinave që është garazhi i tij në Delaware, por një president i Amerikës që me sa duket nuk e mban mend kohën kur ishte zëvendëspresident, as vitin që pësoi humbjen e trishtë të të birit të tij, i moshës së mesme?

Kjo është ajo për të cilën u ideua procesi i shkarkimit: për t’ia lehtësuar një presidenti që nuk ka më zotësitë për të përballuar punën, por që nuk mund ta shohë këtë vetë. Biden jo vetëm që nuk arrin të vlerësojë rënien e tij të njohjes, por ai mendon se mund ta bëjë punën edhe për katër vjet të tjera. Përpjekja e tij për t’i shkrepur të gjitha armët dhe për të hedhur poshtë çështjen e harresës së tij në një konferencë shtypi të nxituar rezultoi e dështuar kur ai ngatërroi Egjiptin me Meksikën, duke lënë të kuptohet se kjo e fundit ka një kufi me Rripin e Gazës.

Kjo nuk ndodhet as në të njëjtin kontinent, zoti President.

Edhe më keq, ky nuk ishte një incident i izoluar. Paraqitjet e Bidenit janë plot me gafa të tilla. Ai nuk mund të përballojë kur është jashtë skenarit, as ndonjëherë kur është në të. Donald Trump, është e vërtetë, ka pasur edhe disa dështime me kujtesën. Por dallimi është se pengesat e tij ligjore kanë luajtur në narrativën që fushata e tij është përpjekur të sprapsë: se udhëheqësia është ngritur kundër tij dhe po përdor gjykatat për ta mbajtur atë jashtë votimeve (diçka në të cilën duket se ka dështuar në seancat e Gjykatës së Lartë). Përplasja ligjore e Bidenit ka luajtur gjithashtu në narrativën që Trump dëshiron të tregojë rreth tij: se ai është i papërshtatshëm për detyrën. Ky i fundit, mendoj se do të jetë vendimtari i vërtetë në këto zgjedhje.

Historia më e gjerë mund të përmblidhet në pyetjen: si është e mundur që një vend me 330 milionë banorë nuk mund të prodhojë dy kandidatë më mbresëlënës?

Fituesit e vërtetë të zgjedhjeve farsë të këtij viti në ShBA, frikësohem, do të jenë Putini dhe Xi Jinping, të cilët do ta përdorin në mënyrë delikate për t’u lënë përshtypje popujve të tyre mbi rreziqet e demokracisë. Por nuk ka që e shpëton fushatën e Biden tani. Nëse kandidon, do të ndiqet kudo nga provat se ai nuk është i përshtatshëm për këtë punë.

Nëse Demokratët me kostume të hirta duan të shmangin poshtërimin, ata kanë shumë pak kohë për ta rrahur krahëve njeriun e tyre.

Ross Clark është gazetar britanik dhe autor i disa librave.

Teskt i botuar në The Telegraph, përkthyer nga KlanKosova.tv.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.