Kaos me pasaportat në Fushë-Kosovë: Vetëm një punëtore për mijëra qytetarë (VIDEO)

Festat e ditëve të fundit e kanë ndërprerë punën. Prandaj edhe fluksi i qytetarëve para sporteleve sa vjen e shtohet.

Ata hyjnë e dalin nga Qendra e Regjistrimit Civil në Fushë-Kosovë, por rendi zor se iu vije, raporton Kiks Kosova.

Për këtë, shumica e tyre po kthehen duar bosh e pa kryer asnjë punë.

Pavarësisht nevojës për pasaportë, ata thonë se nuk kanë kohë të presin me orë të tëra, pasi që i pret puna.

Më së vështiri ta përballojnë këtë gjendje po e kanë të moshuarit e fëmijët, me të qarat e këtyre të fundit që dëgjohen jashtë.

Nga mungesa e karrigeve dhe hapësirave për të pushuar e për të pritur, zor e kanë edhe të gjejnë një vend e të ulen.

Kërkesat e gjithë këtyre personave po mundohet që t’i kryej një punëtore, e cila është e vetme në sportel.

Pavarësisht kërkesave të shumta për të aplikuar e pajisur me pasaportë pas liberalizimit të vizave, siç duket numri i qytetarëve vështirë se po zvogëlohet.

Ndërkaq, pothuajse në çdo qendër të regjistrimit civil në Kosovë çdo ditë po vazhdon tollovia, e cila si duket nuk do të marrë fund. /Klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.