Kajtazi për marrëveshjen: Pozita dhe opozita do të duhej të kishin qëndrim unik përballë Serbisë (VIDEO)

Analisti politik, Vehbi Kajtazi, vlerëson se pozita dhe opozita do të duhej të kishte qëndrim unik përballë Serbisë në dialog dhe arritjen e një marrëveshjeje.

“Në një situatë kur flitet për dialog me Serbinë dhe arritjen e një marrëveshjeje, natyrisht do të duhej të mos kishte dallime mes pozitës dhe opozitës – të kishte një qëndrim unik përballë Serbisë që po duhet me nda hise në shtetin tonë”, u shpreh Kajtazi.

Kajtazi, në Rubikon në Klan Kosova, tha se kjo gjë nuk ka ndodhur në të kaluarën e nuk po ndodhë as tani.

Megjithatë, sipas Kajtazit dy liderët opozitarë, Lumir Abdixhiku i LDK-së dhe Memli Krasniqi i PDK-së nuk kanë fuqi në partitë e tyre për çka i konsideron edhe si ushtrues detyre të kryetarit, njofton Klankosova.tv.

“Por, duke parë që kjo nuk ka ndodhë në të kaluarën e nuk po ndodh as tash, mendoj që opozita e ka luajtur rolin e vetë goxha mirë sado që kemi një opozitë të dobët në numra dhe kemi dy partitë politike që udhëhiqen nga liderë të rinj të cilët siç i shoh unë nuk po arrijnë ende ta kenë kontrollin brenda partive të tyre”.

“Lumir Abdixhiku dhe Memli Krasniqi nuk kanë kontrolle në partitë e tyre, në mënyrë të veçantë zotëri Krasniqi që e shoh si ushtrues detyre të kryetarit të PDK-së. Nëse për çështje kaq të rëndësishme u duhen konsultime për të marrë qëndrime pasi Thaçi e Veseli janë në Hagë, dhe s’mund të flas më shumë – por kjo njëfarë forme i bie se Krasniqi nuk e ka fuqinë e plotë për vendosur për tema si kjo e dialogut”.

“Se i duhet konsultim e di se jam gazetar dhe kam informacione, por kështu e shoh unë që ka shumë dallime me liderëve të vjetër të cilët e kanë pranuar këtë marrëveshje dhe të rinjtë që po e kundërshtojnë dhe me të drejtë synojnë që partia të ecë përpara” tha Kajtazi.

Kajtazi, mes tjerash, foli edhe për dorëheqjen e zëdhënëses politike të LDK-së, Sibel Halimi, për të cilën thotë se dorëheqja e saj u negociua dhe u rikthye sërish në parti.

Rrini të informuar mbi zhvillimet kryesore duke u bërë pjesë e komunitetit tonë në Viber.

BONUS: Merreni aplikacionin tonë në Android dhe iOS.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.