Jepen me koncesion edhe lejet e qarkullimit

Sikur të mos mjaftonte tmerri që duhet të kalojnë shoferët që duhet të kolaudojnë makinat e tyre tek pikat e një koncesionari që premtoi shumë gjëra dhe pak bëri, tashmë qeveria ka në plan të japë me koncesion edhe lejet e qarkullimit.

Qeveria ka vendosur të kalojë tek privati një ndër procedurat kryesore në rastin e blerjes apo importimit të makinave.

Me vendimin e djeshëm i është dhënë e drejta Ministrisë së Transportit që të përzgjedhë një kompani për të kryer Shërbimin e Kontrollit dhe Verifikimit të mjeteve rrugore në Shqipëri.

Bëhet fjalë për kontrollin teknik që duhet të bëjë çdo makinë para se të marrë lejen e qarkullimit.

Ky kontroll deri më tani bëhej nga Drejtoritë Rajonale të Shërbimit të Transportit Rrugor, njofton Gazeta Mapo.