Jahjaga takon zyrtarin e FMN-së

Në takim mori pjesë edhe guvernatori i Bankës Qendrore të Kosovës, Bedri Hamza.

E para e shtetit e falenderoi zyrtarin e FMN-së për punën që Fondi Monetar Ndërkombëtar po bën në mbështetje të zhvillimit ekonomik të Kosovës dhe të përkrahjes së sektorit fiskal dhe financiar në vend.

Jahjaga theksoi se për institucionet e Kosovës është shumë i rëndësishëm stabiliteti fiskal dhe në këtë kuadër tha se duhet vendosur një rregull që kufizon rritjen e pagave në sektorin publik, pasi që një gjë e tillë do të dekurajonte shpenzimet joproduktive dhe arbitrare. Ajo theksoi rëndësinë e investimeve në sektorin e prodhimit, pasi vetëm ashtu do të krijoheshin vendet e reja punës, do të kishte prodhim dhe eksport.

Presidentja  me Min Zhu bisedoi edhe për sektorin e energjisë, ku shprehu qëndrimin se Kosova duhet sa më parë të fillojë ndërtimin e termocentralit të ri, për të përmbushur nevojat e vendit.

Ndërkaq, Zëvendësdrejtori menaxhues i Fondit Monetar Ndërkombëtar  Min Zhu, vlerësoi të arriturat në Kosovë dhe punën që institucionet e vendit po bëjnë në ruajtjen e qëndrueshmërisë fiskale.