Ismet Munishi e quan “Pishmon Arena” projektin e stadiumit të Gjilanit

Trajneri i njohur kosovar Ismet Munishi, e ka quajtur “Pishmon Arena” projektin e stadiumit të Gjilanit.

Munishi parashikoi se ndërtimi i këtij stadiumi do të ndodh në vitin 2060.

“Procedura procedura procedura. Premtime premtime premtime”, thuhet në reagimin e strategut kosovar.

Ministria e Kulturës, Rinisë dhe Sportit. disa herë i ka pezulluar procedurat e prokurimit dhe tenderimit për projektin e ndërtimit dhe rinovimit të Stadiumit të Gjilanit.

Së fundmi herë kjo ndodhi më 18 mars.

Kjo gjë ndodhi pak ditë pasi u shpall kompania fituese me ofertën mbi 12.7 milionë eurosh.

Ky vendim erdhi si rezultat i disa kërkesave për rishqyrtim të paraqitura nga operatorë ekonomikë të pakënaqur me procesin e tenderimit.

Sipas Zyrës së Prokurimit të MKRS-së, pezullimi ka ndodhur në përputhje me Ligjin për Prokurimin Publik të Republikës së Kosovës, i cili parashikon ndalimin e mëtejmë të aktiviteteve të prokurimit në raste kur ka ankesa nga operatorët pjesëmarrës në garë.

MKRS-ja tutje tregon që autoritetet do të informojnë palët e interesuara për çdo vendim të ardhshëm.

Procesi mund të vazhdojë nëse ankesat refuzohen por mund të ketë rishpallje të tenderit ose ndryshime në kushtet e kontratës nëse haset në parregullsi.

“Në një stadium si ky, pa plotësimin e asnjë kushti, nuk do të zhvillohet më një derbi i këtij niveli”, kishte thënë kryetari i Gjilanit, Alban Hyseni, në nëntor të vitit 2021, pasi kishte përcjellë derbin lokal midis Gjilanit dhe Dritës.

Ndërkohë, Ministria e Sportit ka reaguar duke thënë që procedura e prokurimit të këtij stadiumi nuk është pezulluar, porse palët pjesëmarrëse në tender kanë afatet e paraqitjes së kërkesave për rishqyrtim kur ka mospajtime nga ana e tyre lidhur me rezultatin dhe ky afat pritet të përmbyllet brenda pesë ditësh.

Pezullohen procedurat e prokurimit për rinovimin e stadiumit të Gjilanit

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.