Hoti për 6 kushtet e Kurtit për Asociacionin: Janë jorelevante – dialogu kishte strukturë më të mirë në qeverinë e kaluar

Deputeti i Lidhjes Demokratike të Kosovës, Avdullah Hoti, ka thënë se i konsideron si jorelevante kushtet e vendosura nga kryeministri i vendit, Albin Kurti, në lidhje me Asociacionin.

Ai tha se dialogu në situatën aktuale është në një fazë kritike për të cilin tha se strukturën më të mirë e kishte në qeverinë paraprake.

“Mendoj që janë jo relevante për diskutimin që po bëhet. Kosova ka filluar procesin e dialogut që nga viti 2011. Më 2013 është nënshkruar marrëveshja e përgjithshme dhe pastaj janë nënshkruar plot marrëveshje nëpër sektorë të ndryshëm që e kanë shtrirë sovranitetin e shtetit të Kosovës në gjithë territorin deri në masën që Kosova sot ka Zyrën Ndërlidhëse në Beograd”.

“Por kjo qeveri e ndërroi formatin e dialogut. Jemi në një pikë kritike kur duhet të bëjmë një hap të madh përpara. Sa i përket Asociacionit, është marrëveshja e vitit 2013 që është ratifikuar në Kuvend, pra që e ka bërë Asociacionin obligim të shtetit të Kosovës”, është shprehur Hoti për Zërin e Amerikës, transmeton Klankosova.tv

Tutje, ai tha se marrëveshja e parimeve në vitin 2015 e ka vendosur një siguresë për sa i përket çështjes së Asociacionin, ku thuhet se Statuti i Asociacionit e merr pëlqimin e Gjykatës Kushtetuese përpara se të dekretohet nga ana e qeverisë.

“Tani është përgjegjësia e jona si spektër politik që të marrim përgjegjësi për shtetin e Kosovës dhe të lëvizim përpara në proces të dialogut, përfshirë edhe Asociacionin”, është shprehur Hoti, përcjell Klankosova.tv.