Hill: Serbia është kthyer kah Perëndimi, lidhjet e saj me Rusinë po veniten

Për Serbinë është e rëndësishme se si do t’i qaset planit për marrëveshje me Kosovën, pasi që kjo mund të ndikojë në shpejtësinë e saj në rrugën drejt Perëndimit.

Kështu është shprehur Ambasadori i ShBA-së në Beograd, Christopher Hill, i cili ka theksuar se Serbia nuk po sheh kah Rusia dhe se lidhjet e saj me Moskën janë duke u venitur.

“Serbia tashmë ka vendosur që të kthehet kah Perëndimi dhe mendoj se është frustruese për shumë serbë që procesi është duke marrë shumë kohë”, ka thënë Hill për N1, transmeton KlanKosova.tv.

Ai është pyetur nëse më bashkëpunues është Kryeministri i Kosovës, Albin Kurti apo presidenti serb, Aleksandër Vuçiq ku më pastaj duke buzëqeshur është përgjigjur: “Nëse do të mendoja se përgjigja ime do të ndihmonte në negociata, do ta thoja, por po e lë në imagjinatën tuaj”.

Hill duke folur për Asociacionin e Komunave me Shumicë Serbe ka theksuar se kur një palë pajtohet që të zbatojë diçka, duhet ta bëjë atë.