Haradinaj: Shqiptarët në Euro 2024 i dhanë hijeshi shesheve e stadiumeve – mezi presim edhe kualifikimin e Kosovës

Kryetari i AAK-së, Ramush Haradinaj, ka reaguar pas eliminimit të Shqipërisë nga Euro 2024, duke thënë se këtë herë, Kampionati Evropian ka shpërfaqur kulturën dhe shpirtin shqiptar.

Haradinaj tha se tifozëria shqiptare u ka dhënë hijeshi shesheve e stadiumeve të Gjermanisë, kudo ku janë ndeshur kuqezinjtë.

“Kombëtarja e Shqipërisë, megjithëse nuk arriti të kualifikohet për të tetën e finales, dëshmoi se është e denjë të renditet ndër ekipet më të mira të sportit më të popullarizuar në Evropë. Asaj i urojmë më shumë sukses në kampionatet e radhës, e deri në Kampionatin Botëror, ku me padurim e presim edhe kualifikimin e Kombëtares së Kosovës”, shkroi Haradinaj, transmeton Klankosova.tv.

Tutje, Haradinaj tha se atmosfera e krijuar nga shqiptarët e të gjitha trevave, e posaçërisht nga diaspora, sipas tij, do të renditen ndër margaritarët e këtij kampionati.

Mbrëmë rrugëtimi i Shqipërisë në Euro 2024 ka marrë fund pas humbjes minimale nga Spanja.

Shqipëria u rendit e fundit në grup me vetëm një pikë, kurse tutje u kualifikuan Spanja dhe Italia.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.