Haradinaj pret në takim ministrin e Mbrojtjes të Italisë, Guerini

Haradinaj pret në takim ministrin e Mbrojtjes të Italisë, Guerini

10 muaj më parë

Kryeministri në detyrë i Kosovës, Ramush Haradinaj, ka pritur sot në takim ministrin e Mbrojtjes të Italisë, Lorenzo Guerini.

Duke vlerësuar lart marrëdhëniet e shkëlqyera bilaterale mes dy vendeve, Haradinaj ka uruar që këto marrëdhënie të thellohen edhe më tej në të ardhmen dhe ka falënderuar shtetin e Italisë për gjithë angazhimin por edhe përkrahjen dhënë Kosovës në procese të ndryshme, shumë të rëndësishme për vendin, transmeton Klan Kosova.

“Si mike e Kosovës, Italia në vazhdimësi ka mbështetur perspektiven tonë të integrimit dhe ka qenë afër nesh në proceset jetike për konsolidimin dhe shtetbërjen e Kosovës”, është shprehur Haradinaj.

Ai njëkohësisht e ka njoftuar ministrin e Mbrojtjes të Italisë, Lorenzo Guerini për progresin por edhe sfidat me të cilat po përballet Kosova, veçanërisht në sferën politike dhe për të arriturat në sferën e sigurisë në vend.

Haradinaj po ashtu ka theksuar se është më së i nevojshëm krijimi i institucioneve të Kosovës sa më shpejtë që të jetë e mundur në mënyrë që proceset që kanë ngecur të ecin përpara.

Ndërkaq ministri i Mbrojtjes i Italisë, Lorenzo Guerini, ka falënderuar nikoqirin për mikpritjen dhe bashkëpunimin e deritashëm mes Kosovës dhe Italisë, derisa ka shprehur gatishmërinë që këto raporte të zgjerohen edhe më shumë në të mirën e një partneriteti të mirëfilltë.