Hajdari nga OVL e Drenasit: Familja e Jakup Krasniqit është izoluar në një vend (VIDEO)

Kryetari i OVL-së së UÇK-së në Drenas Enver Hajdari dhe zyrtarë të tjerë të kësaj organizate po qëndrojnë afër shtëpisë së Jakup Krasniqit në Negroc ku po vazhdon operacioni i bastisjes nga EULEX-i dhe Policia e Kosovës.

“Jemi njoftuar që po bastiset shtëpia e zëdhënësit të UÇK-së dhe bashkëluftëtarit tonë Jakup Krasniqi. Këto bastisje nuk janë të mira, sepse janë të njëanshme – bastisen veç ushtarët dhe zinxhiri komandues i UÇK-së”.

“Ne nuk e njohim dhe nuk do ta njohim këtë gjykatë, sepse është gjykatë e njëanshme dhe raciste. E dinë shumë mirë ku janë kriminelët, derisa bastisjet si kjo e sotmja e shohim si gjënë më të turpshme që ndodh pas 20 vitesh”.

Hajdari ka thënë se nga komunikimet me vëllain e Jakup Krasniqit është njoftuar se familjarët e këtij të fundit janë izoluar në një dhomë dhe, sipas tij, po maltretohen psiqikisht, njofton Klan Kosova.

“Kemi komunikuar me vëllain e tij pak më herët. Sipas tij, familja janë izoluar në një vend dhe sipas tyre ka ndodhur një gjë që s’ka ndodhur askund në botë – izolim, maltretim psiqik dhe bastisje”.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.