Eksperti kroat: Ngjarjet e fundit në veri e kthejnë Kosovën ashtu siç është – viktimë

“Radikalizimi i marrëdhënieve në veri të Kosovës i përshtatet Vuçiqit, sepse ai siguron atje tension të zgjatur. Përderisa e kemi Kosovën në agjendë, ne nuk merremi me çështje që janë shumë të pakëndshme”, tha eksperti kroat i marrëdhënieve ndërkombëtare Sandro Knezoviq në televizionin kroat, HRT.

“Në anën tjetër, edhe Kurti në Prishtinë është rehat me këtë lloj përshkallëzimi, sepse legjitimon pretendimin se forcat speciale policore duhet të vendosen në veri të Kosovës dhe të kontribuojnë në stabilizimin afatgjatë në rajon”, tha Knezoviq, duke shtuar se të dy kanë një nxitje të drejtpërdrejtë për të kontribuar në përshkallëzimin e agjendës së tyre.

Ndërkaq Goran Bandov, njohësi kroat i politikës ndërkombëtare, tha se çdo përshkallëzim i përshtatet të dyja palëve, por Kosovës pak më shumë.

“Vuçiqit në këtë moment nuk i ka shkuar për shtati sepse Kurti bëri disa veprime në lëvizjet e fundit diplomatike që irritonin aleatët e tij kryesorë. Ai ishte në një pozicion humbës. Tani ai është përsëri në pozicion fitues sepse ky përshkallëzim ka treguar se Serbia është faktori kyç përçarës. Kjo situatë më shumë i përshtatet Kosovës sepse e ka vënë sërish në pozitën e viktimës, siç edhe është Kosova”, tha Bandov.

Ai shtoi se procesi manipulues në Serbi është më problematiku për zgjidhjen e çështjes së Kosovës.

“Serbia nuk po përballet me të kaluarën, ku krijohen heronj që sigurisht nuk janë heronj, njerëz që duhet të përfundojnë në burgje”, tha ai.

Knezoviq tha se është e vështirë të besohet se Beogradi zyrtar nuk ka lidhje me sulmin në Kosovë.

“Nxehja e çështjes së Kosovës është gjithmonë një gjë e mirë nëse mund të tregoni se po luftoni për aspiratën shekullore të popullit serb për të qëndruar në vatrat e tyre”, tha Knezoviq dhe shtoi se është e vështirë të argumentohet tubimi spontan grupor i serbëve nga veriu i Kosovës.

“Është e vështirë të besohet se në mesin e atyre njerëzve ka kaq shumë njerëz të trajnuar që mund të operojnë mjete të tilla. Këta nuk janë njerëz të rrugës, ata kishin trajnim dhe koordinim. Ata kishin komunikim me radio dhe fakti është se aksione të tilla janë përgatitur paraprakisht”, tha Knezoviq.

“Në anën tjetër, Kurti prezantohet para elektoratit të tij si një person që mbron çështjen e Kosovës dhe mundohet ta kompletojë historinë e shtetësisë së Kosovës në mënyrat më adekuate. Nuk ka konsensus për shtetësinë e Kosovës në Bashkimin Evropian, kështu që është vështirë të flitet për përfundimin e këtij procesi” dialogues, tha ai.

Bandov tha se Serbia në njëfarë mënyre e ka pranuar se Kosova ekziston. “Kur uleni në tavolinë me përfaqësuesit e Kosovës, ju e pranoni ekzistencën e shtetit”, tha Bandov.

Vuçiqi në fjalimin e tij të së dielës në lidhje me përshkallëzimin e dhunës në veri, tha se Serbia nuk do ta njohë kurrë Kosovën.

“Mesazhi im për ata që mendojnë se Serbia do ta njohë Kosovën e pavarur: gjithçka që bëtë sot e forcoi popullin serb dhe unë të them: Ne kurrë nuk do ta njohim Kosovën e pavarur, ju mund të na vrisni të gjithëve. Kurrë, krijesën monstruoze që e krijuat ju duke bombarduar Serbinë. Por, do të bisedojmë gjithmonë”, tha Vuçiqi. /Klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.