Ekspertët ndërkombëtar: Demarkacioni në përputhje me ligjet e Kosovës

Fletcher Burton, kryetar i Komisionit  Ndërkombëtar për Demarkacion – i themeluar me urdhër të presidentes Atifete Jahjaga, në një konferencë për medie ka thënë se nga studimi që i kanë bërë dokumentacionit kanë ardhur në përfundim se Komisioni Shtetëror për Demarkacion me Malin e Zi është bazuar në ligjet e Kosovës gjatë punës së bërë, njofton Klan Kosova.

“Faleminderit për mundësinë për ta rishikuar procesin e demarkacionit. E di që debati për kufijtë mund të jetë shumë i vështirë, kam përvoja personale në këtë pikë. Jam i familjarizuar me dokumentet dhe jam i kënaqur që bashkë me kolegët e mijë kemi qenë në këtë mes dhe këtu kemi bashkëpunuar dhe kemi kryer një punë të përbashkët”.

“Këto javët e fundit kemi takuar palët që i kanë shfaqur pakënaqësitë. Kemi sjellë ekspertizën profesionale. Kemi takuar akademikët, profesionistët, kemi folur lidhur me demarkacionin me Malin e Zi, kemi diskutuar edhe me qytetarë të shqetësuar, sidomos me persona ku jetojnë në rajonin ku po bëhet demarkacioni bashkë me ekspertët tjerë kemi udhëtuar edhe vetë për të parë kufirin dhe kemi marrë përshtypjet e dorës së parë. Është një proces i rëndësishëm”.

“Kemi pasur një interesim të madh mediatik, për të ndërtuar raportin përfundimtar të cilin ia kemi dorëzuar presidentes Jahjaga, ne tashmë e kemi deponuar raportin përfundimtar me të gjeturat tona këtë ia kemi dhënë presidentes Atifete Jahjaga”.

“Këtu kemi sjellur perspektivën ndërkombëtare, për shkak të backgroundit tim në ICO, ne kemi marrë parasysh rendin juridik dhe kushtetues të Kosovës në këtë raport dhe fokusi jonë ka qenë çështja ligjore – bazamenti ligjor i kësaj çështje. Pas punës sonë kemi gjetur se komisioni shtetëror për Demarkacion është mbështetur në një themel të fort të bazave ligjore, ne kemi gjetur se nga këndvështirmi legal, komisioni shtetëror është bazuar në ligjet e Kosovës”.

Herbert Wilmes, anëtar i këtij komisioni ka deklaruar se për mendimin e tyre palët që e kanë realizuar demarkacionin duke u bazuar në metoda moderne dhe të sakta.

“Ne kemi dhënë një ndihmesë teknikë në këtë proces, mund të them se dy komisionet ndërkombëtare kanë përdorur teknikat më moderne për përcaktimin e vijës dhe kanë arritur të vendosin koordinata të sakta me centimetra nëse i referohemi dy palëve. Këtu flasim për një kufi ndërkomunal që e kanë përcaktuar kufirin që tash është ndërshtetëror”.

klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.