15:19, 18 Shtator 2019

Kryeministri i Shqipërisë, Edi Rama iu rikthye letrave publike për opozitën jashtëparlamentare, por ndryshe nga të shkuarat krahas Lulzim Bashës ai i drejtohet edhe 6 krerëve të partive aleate, Monika Kryemadhi, Nard Ndoka, Vangjel Dule, Agron Duka, Dashamir Shehi dhe Fatmir Mediu.

Ai i kërkon drejtuesve  opozitarë  të harrojnë për një moment kundërshtitë politike  në mënyrë që të  nisin sa  më parë dialogun  pa kushte për reformën zgjedhore

“Procesi ka nisur në Kuvend me opozitën parlamentare dhe do të mbyllet në Kuvend natyrisht, por mungesa juaj ne institucionin më të lartë vendimmarrës të republikës, nuk ju përjashton vetvetiu nga hapësira e diskutimit për Reformën Zgjedhore. Përkundrazi. Të paktën ky është opinioni im dhe duke vënë re edhe mungesën tuaj në vetë tryezën e Komisionit Zgjedhor, ju ftoj të takohemi e të bashkëbisedojmë për këtë sfidë të përbashkët, në çdo kohë e vend që do t’ju vinte për shtat – sigurisht në rast se ju jeni të interesuar të përfshiheni në këtë proces. Pa kushte”, shprehet Rama.

Ftesa publike  për opozitën  jashtëparlamentare erdhi  pasi prezenca e OSBE në bashkëpunim të bashkëkryetarëve të reformës zgjedhore  ftoi opozitën jashtëparlamentare  në  një tryezë diskutimi të mërkurën e 25 shtatorit. Lulzim Basha  nuk mohoi mbërritjen e ftesës në selinë blu, por  edhe pse la një shteg hapur ai nuk u duk optimist për zgjidhjen e krizës.

“Po t’i shikojmë ftesat se ftesat bëhen javë për javë. Do t’i shikojmë, do t’i vlerësojmë, zgjidhja e krizës politike është prioriteti ynë. Natyrisht jemi të angazhuar edhe për reformën zgjedhore. Por, askush të mos ketë iluzione se zgjidhja e krizës politike kërkon shumë më shumë se sa një tryezë tjetër”, tha Lulzim Basha, raporton Tch, transmeton Klan Kosova.

Reforma zgjedhore  po shihet  nga ndërkombëtarët si shtysë për nisjen e dialogut  mes mazhorancës dhe opozitës jashtëparlamentare. Prezenca e OBSE-së ishte zëri i dytë ndërkombëtar pas Bashkimit Europian që kërkoi bashkëpunimin e gjithë aktorëve politike.

 

Konkurs Pune

Lexo më shumë