Edi Rama bën thirrje në OKB: Njohja e Kosovës ndihmon Ballkanin

Kryeministri i Shqipërisë, Edi Rama ka folur përpara të pranishmëve në Asamblenë e Përgjitshme të OKB-së, duke bërë thirrje për njohjen e Republikës së Kosovës nga vendet anëtare të kësaj organizate, transmeton Klan Kosova.

Rama ka deklaruar se njohja e Kosovës ndihmon në forcimin e bashkëpunimit në Ballkan dhe është gjithashtu në të mirë të Serbisë.

“Duke njohur Kosovën jepni një kontribut të qartë për të forcuar bashkëpunimin në rajon. Një njohje e plotë e Kosovës nga të gjitha kombet e kësaj Asambleje do të jetë e mirë edhe për Serbinë. Që nga Samiti i Vjenës, rajoni ynë është duke u zhvilluar në mënyrë të suksesshme së bashku”, ka thënë Rama.

Kryeministri shqiptar ka folur edhe për rëndësinë e harmonisë fetare në të gjithë botën, duke dhënë si shembull bashkëpunimin dhe harmoninë që ekziston mes besimeve fetare në Shqipëri.

Pas përfundimit të fjalimit, kryeministri Rama ka shkruar në Twitter: “U krye dhe detyra e lartë për t’i dhënë zë atdheut në Kombet e Bashkuara. Mirënjohës gjithkujt që ma ka dhënë besimin”.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.