Edhe Prishtina ndez flakadanë për Epopenë e UÇK-së (FOTO)

Në sheshin “Skënderbeu” në kryeqytet, Komuna e Prishtinës ka ndezur flakadanë për nder të 25 vjetorit të Epopesë së UÇK-së.

Kryetari, Përparim Rama, tha se ndezja e flakadanëve bërë në orën 18:00, në të njëjtën kohë kur edhe ndizen në të gjithë Kosovën në solidarizim me Natën e Zjarreve që mbyllet sonte në Prekaz.

“Kjo është një shenjë nderi, respekti për familjen e madhe Jashari, të cilët e kanë flijuar jetën e tyre që ne sot ta festojmë lirinë, është një organizim që e kemi bërë edhe vitin e kaluar dhe tash e tutje do të jetë organizim për çdo vit, edhe normal që çdo vit edhe do të madhërohet shumë e më shumë për të nderuar sakrificën e familjes Jashari, për të nderuar të gjithë ata që kanë dhënë jetën për lirinë e vendit tonë, për lirinë që e gëzojmë sot këtu”, tha Rama.

Ai ftoi të gjithë qytetarët që t’i shohin nga afër prezantimet e historikut që janë të vendosura në këtë shesh dhe bëri thirrje që të informohen gjenerata e reja për këtë luftë.

“Ftoj të gjithë që të vijnë këtu. Kemi disa pamflete atje, disa prezantime të historikut prej viteve të 90’ta e deri më tani, e deri faktikisht në luftë e më pastaj të familjes, në peripecitë që ata i kanë kaluar edhe faktet që kanë ndodhur me familjen t’i mbajmë mend gjithmonë që t’i mësojmë edhe gjeneratat e reja që edhe fëmijët tanë të dinë për historinë se si është fituar liria, se liria është fituar me gjak edhe tash duhet të punojmë sa më shumë që ta ngrisim nivelin e edukimit, pra që të forcohemi që të mos lejojmë në të ardhmen të ndodhin këto gjëra, këto masakra kurrë me popullin tonë, pra ta mbrojmë paqen me dijeni, ta mbrojmë lirinë me dijeni e po ashtu gjithmonë t’i përkujtojmë ata të cilët flijuan jetën që ne ta gëzojmë lirinë sot”,u shpreh Rama.

*Klikoni KËTU për t’u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.