Detaje nga Brukseli pas fillimit të takimit trepalësh (VIDEO)

Ka nisur takimi trepalësh në Bruksel midis kryeministrit Albin Kurti, presidentit serb Aleksandër Vuçiq, si dhe përfaqësuesit më të lartë të BE-së për Politikë të Jashtme, Joseph Borell e të dërguarin e posaçëm të BE-së për dialogun, Miroslav Lajçak.

Ekipi i Klan Kosovës po qëndron në vendin e ngjarjes, ku po e përcjell nga afër situatën atje.

“Paraprakisht ka pasur edhe zhvillime të ndryshme që kanë të bëjnë me takimin mjaft të rëndësishëm për shkak se për herë të parë në shumë e shumë vite në dialogun Kosovë-Serbi është diçka konkrete që ndodhet në tavolinën e bisedimeve”, ka thënë për Klan Kosovën gazetari i këtij mediumi, Besnik Tahiri.

“Ai është plani evropian i përpiluar nga Bashkimi Evropian ose i përpiluar nga zyra për politikë të jashtme, pra e diplomacisë këtu në Bruksel të Belgjikës, dhe po ashtu si nismë që ishte e Gjermanisë dhe Francës, më saktësisht e kancelarit Olaf Scholz dhe presidentit Emmanuel Macron, që ka të bëjë me një marrëveshje të mundshme bazë mes Kosovës dhe Serbisë e cila sipas kryeministrit të Kosovës përmban preambulën me pesë fjali, dhe po ashtu dhjetë pika të asaj se si duhet të pajtohen në mënyrë bazike Kosova dhe Serbia”.