Çka është Sky ECC, platforma që po lufton grupet kriminale?

Në operacionet e mëdha antidrogë të zhvilluara sot në Prishtinë, Suharekë, Pejë, Viti dhe Gjilan, janë arrestuar disa persona të dyshuar për trafikim droge dhe krim të organizuar.

Ky aksion është mbështetur në informacione të marra nga komunikimet e përgjuara në aplikacionin e njohur Sky ECC, i cili njihet si një mjet i përdorur gjerësisht nga grupe kriminale ndërkombëtare, transmeton klankosova.tv.

Por çfarë saktësisht është Sky ECC?

Sky ECC ishte një aplikacion i mesazheve të enkriptuara, i zhvilluar nga kompania kanadeze Sky Global.

Ky shërbim ofronte komunikim të sigurt përmes mesazheve që mund të shkatërroheshin automatikisht pas një periudhe të caktuar kohe, si dhe mundësinë e aktivizimit të një “butoni paniku” që fshinte të dhënat në rast të dyshimit për kompromis të pajisjes. Sky ECC ishte i njohur për përdorimin e tij nga grupe kriminale për aktivitete të tilla si trafikimi i drogës, pastrimi i parave dhe krime të tjera të rënda.

Në vitin 2021, një operacion ndërkombëtar i udhëhequr nga autoritetet belge, holandeze dhe franceze, i mbështetur nga Europol dhe Eurojust, arriti të depërtonte në rrjetin e Sky ECC.

Ky operacion çoi në arrestimin e mbi 5,600 individëve dhe konfiskimin e një sasie të madhe droge dhe pasurish të paligjshme.

Aksione të tilla të mëdha kundër krimit të organizuar në Shqipëri, të mbështetura nga informacionet e marra nga aplikacioni i enkriptuar Sky ECC, fillimisht ishin operuar edhe nga Prokuroria e Posaçme Kundër Korrupsionit dhe Krimit të Organizuar – SPAK.

Rëndësia e Sky ECC në luftën kundër krimit të organizuar

Informacionet e marra nga komunikimet e përgjuara në Sky ECC kanë qenë thelbësore për zbardhjen e aktiviteteve kriminale në shumë shtete, përfshirë Kosovën dhe rajonin e Ballkanit.

Në Bosnjë e Hercegovinë, për shembull, mbi 2,200 individë kishin instaluar aplikacionin Sky ECC, dhe shumë prej tyre janë arrestuar për trafikim droge dhe aktivitete të tjera kriminale.

Në Kosovë, përdorimi i Sky ECC ka qenë gjithashtu i përhapur mes grupeve kriminale.

Informacionet e marra nga ky aplikacion kanë ndihmuar autoritetet kosovare në identifikimin dhe arrestimin e individëve të dyshuar për përfshirje në aktivitete të paligjshme.

Aksionet e sotme antidrogë në Kosovë, të mbështetura nga informacione të marra nga Sky ECC, theksojnë rëndësinë e bashkëpunimit ndërkombëtar dhe përdorimin e teknologjisë në luftën kundër krimit të organizuar.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.