Çka është helicobacter pylori?

Helicobacter pylori është një mikroorganizëm i cili gjendet kudo dhe është prezent në afro 50% të popullsisë globale. Infeksioni kronik me Helicobacter pylori shkakton ndryshime atrofike dhe metaplastike në lukth, si dhe prania e tij lidhet me paraqitjen e ulçerës peptike ( I thatit në lukth apo në zorrën dymbëdhjetgishtore).

Rruga më e zakonshme e infeksionit me Helicobacter pylori është me rrugë orale-orale dhe rrugë fekalo-orale.

Zakonisht infeksioni me H.Pylori ka një paraqitje të njejtë si tek meshkujt ashtu edhe tek femrat. Është më e shprehur tek popullsia Latine dhe më pak e shprehur tek personat e racës së bardhë. Femrat dhe fëmijët kanë një incidenc më të lartë për riinfeksion 5-8% në krahasim me të rriturit.

Cilat janë shenjat dhe simptomat e infeksionit me H.Pylori ?
Në përgjithësi pacientët e infektuar me H.Pylori janë asimptomatik dhe nuk përshkruhen shenja tipike klinike.
Kur shenjat dhe/ose simptomat janë prezente mund të pëfshihen si në vijim:

• Nauzea ( mundim dhe ndjenja për të vjellur),
• Vjellje,
• Dhembje barku,
• Ndjenja e djegësimit të gjoksit,
• Barkqitje,
• Ndjenjë e urisë në mengjes,
• Erë e rëndë e gojës.

Si bëhet diagnostifikimi i H. Pylorit ?
Analizat laboratorike:
Tek pacientët e dyshimt për H.pylori, analizat e mëposhtme laboratorike ndihmojnë në diagnostifikim:

• Testi i antigjenit të H.Pylorit në feces : shumë specifik (98%) dhe senzitiv ( 94%); rezultate pozitive fitohen në stadet fillestare të infeksionit me H.Pylori; kjo formë e testimit përdoret edhe për të detektuar eradikimin pas trajtimit.
• Karbon-13 testi i ureazes me frymë: Koncentrimi i karbonit të markuar është i lartë vetëm nëse është prezente ureaza në lukth, reaksion ky i mundshëm vetëm me rastin e infeksionit me H.Pilori.
• Serologjia e H.Pylorit: Specifitet dhe sensitivitet të lartë ( >90%); I vlefshëm për detektimin e pacientëve të infektuar rishtazi por jo i vlefshëm për të përcjellur pacientët e trajtuar.

Antibiogrami: I vlefshëm në zonat gjeografike me rezistencë të lartë në Metronidazol dhe klaritromicin , këta antibiotik nuk duhen rekomanduar si barnat e linjes së parë të trajtimit në këto zona.

Cilat sëmundje shkaktohen nga infeksioni me H.Pylori:
Nga infeksioni me H.Pilori shkaktohen:

• Gastriti kronik
• Gastriti atrofik
• Metaplasioni intestinal: që mund të kalojë në displazion
• Adenokarcinoma e lukthit :që duhet të percillet me ultrazë dhe me esofagogastroduodenoskopi tek pacientët me MALToma për qëllime të stadifikimit preciz të sëmundjes.

Cili është roli i imazherisë në diagnostifikimin e H.pylorit ?
Imazheria diagnostike nuk na ndihmon shumë për diagnostifikim të H.Pilorit por që mund të na ndihmoj tek pacientët me komplikime ( Sëmundja ulçeroze,kanceri i lukthit, MALT-omat).

Endoskopia e sipërme :e domosdoshme tek pacientët me simptome të sëmundjes ulçeroze për të parë dëmtimet mukozale të lukthit dhe duodenumit. Marrja e biopsisë na ndihmon për përcaktimin histologjik të proceseve patologjike në mukozën e lukthit dhe duodenumit. Ekoendoskopia iu bëhet pacientëve me biopsy pozitive për MALT-omat gastrike dhe për stadifikimin e saktë të sëmundjes.

Si të trajtojmë infeksionin me H.Pylori ?
Trajtimi bëhet vetem tek pacientët me rezultate pozitive për H.Pylori. E rëndesishme është të kemi parasysh rezistencën e mundshme të antibiotikeve për përcaktimin e trajtimit.
Ekzistojnë skema të ndryshëm për trajtimin i infeksionit me H. Pylori , e ato janë :
Një inhibitor i pompës protonike ( Omeprazol,Pantoprazol, Esomeprazol,Lansoprazol)+ dy antibiotik ( Amoksicilin +Klaritromicin ) nga 7 deri 14 ditë.
Skemë tjetër është : Një IPP+ Amoksicilina+Metronidazol ose Klaritromicinë+Metronidazol. Skemë tjetër: Bizmuth salycilate+Metronidazol+Tetracycline për 14 ditë.Skemë tjeter është : IPP+Levofloksacin+Amoksicilin për 7-14 ditë.

Gjatë trajtimit për eradikimin e H.Pylorit mund të paraqiten efekte anësore siç janë: mundim,shije e metalit në gojë, skuqje lëkurore, vjellje ose barkqitje në këto raste ndërpritet trajtimi dhe mjekohen simptomet e paraqitura.