Borrelli i bën bashkë Osmanin e Vuçiqin në New York (FOTO)

Presidentja, Vjosa Osmani dhe homologu i saj serb, Aleksandar Vuçiq janë takuar sot në New York.

Ky takim mes tyre vjen nën organizimin e përfaqësuesit të Lartë të BE-së, Josep Borrell, ku pjesë qenë edhe katër presidentë tjerë të vendeve të Ballkanit Perëndimor, përfshirë edhe atë të Shqipërisë, Bajram Begaj, raporton Klankosova.tv.

Osmani shkruan se në diskutim, ka ritheksuar që “dhënia e statusit të vendit kandidat për Kosovën është interes strategjik”.

Pas drekës, është deklaruar edhe presidenti i Serbisë, Aleksandar Vuçiq.

“Edhe këtë drekë joformale, të organizuar nga Josep Borrell dhe Shërbimi Evropian i Veprimit të Jashtëm, e shfrytëzova për të vazhduar luftën për të ruajtur paqen dhe stabilitetin dhe për të përshpejtuar zhvillimin e Serbisë dhe të gjithë Ballkanit Perëndimor”, ka shkruar Vuçiqi pas kësaj dreke.

Ai tha se Serbia “vazhdon të udhëheqë një politikë të përgjegjshme dhe parimore, të bazuar në ruajtjen e interesave kombëtare, të hapur ndaj bashkëpunimit konstruktiv në rajon që synon përmbushjen e objektivit tonë strategjik – anëtarësimit në BE”.

“Si çdo progres, edhe kjo rrugë e përbashkët evropiane kërkon bashkëpunim, mirëkuptim dhe mbështetje të besueshme nga partnerët”, potencoi Vuçiqi në një postim në Facebook.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.