18:38, 23 Korrik 2019

Gjatë takimit që e zhvilloi me strukturat e Partisë Demokratike në Has, Lulzim Basha theksoi se “aksioni politik i opozitës do të vazhdojë deri në përmbushjen e objektivit që janë zgjedhjet e parakohshme parlamentare, në të njëjtën ditë me zgjedhjet lokale nën kujdesin e një qeverie tranzitore, pa Edi Ramën”.

Sipas tij, mesazhi i dyfishtë i 30 qershorit ishte refuzimi i Edi Ramës dhe kërkesa për ndryshim.

“Ndryshimi i thellë, ekonomik dhe politik është prioriteti numër një i Partisë Demokratike e cila ka një program të qartë që zgjidh problemet e biznesit, rinisë, fermerëve dhe problemin e papunësisë si problemi kryesor i vendit”, ka deklaruar Basha.

Lulzim Basha tha gjithashtu se në gjashtë vjet qeverisje Edi Rama shkatërroi tre themelet e bashkëjetesës demokratike – pluralizmin, zgjedhjet e lira dhe shtetin e së drejtës, shkruan Top Channel.

“Farsa e 30 qershorit i shërbeu mbarë botës për të parë se ky njeri nuk bën dot zgjedhje. Edhe kur vetë kandidon, vetë voton, vetë numëron, vetë tabulon, vetë shpall rezultatin, prapëseprapë, nuk rri dot pa i vjedhur zgjedhjet. Për pushtetin dhe pasurinë e tij është i gatshëm t’i vërë kazmën pluralizmit dhe demokracisë”, tha kreu i opozitës.

Konkurs Pune

Lexo më shumë