0:01, 27 Maj 2020

Ministrja në detyrë e Arsimit, Shkences, Teknologjisë dhe Inovacionit Hykmete Bajrami, ka folur për procesin e hapjes së shkollave pas gjendjes me pandeminë Covid-19 në Kosovë.

Bajrami në Specialen në Klan Kosova tha se po shqyrtohet mundësia që këtë kohë të mbetur nxënësit të kthehen në shkolla.

“Jemi në fund të gjysmevjetorit të dytë. Kemi qenë të interesuar që bile të paktën këtë kohë të i kthejmë nxënësit në shkolla. Kemi qenë në kontakt me Ministrinë e Shëndetësisë z. Vitia dhe me kryesuesin e IKSHPK-së z.Ramadani”

“Në qoftë se ndodh kthimi në shkolla duhet të respektohen rekomandimet e Institutit, duke mbajtur distancën prej 2 metrash, duke mbajtur maska edhe doreza. Po ashtu duhet edhe të dezinfektohet edhe çdo objekt shkollor që përdoret në procesin edukativ-arsimor”.

“Është diskutuar edhe mbajtja e provimit të maturës dhe testit të arritshmërisë duhet të mbahet në afat kohor prej dy javësh prej njëri-tjetrit”.

Kthimi në procesin mësimor do të jetë sfiduese për komunat.

“Nuk ka logjistikë edhe është sfiduese për komunat kthimi i nxënësve në shkolla, sepse komunat nuk kanë logjistikë dhe financa. Pra, nuk kanë kontrata me kompanitë që e dezinfektojnë objektet”

E para e MASHTI-it theksoi se ka pasur edhe një skenar tjetër për rifillimin e mësimit.

“Ne kemi edhe një skenar që ti kthejmë fillimisht parafillorët, klasa e parë, të pestë, të nëntë dhe 12-ta në shkollë. Kjo për faktin se parashkollorët vitin tjetër fillojnë shkollën, klasa e parë për shkak të mësimit të Abetares, klasa e pestë per shkak se nxënësit fillojnë mësimin me arsimtarë, klasa e nëntë dhe 12-të për shkak të maturantëve për provimin shtetëror të maturës”.

Ajo tha se të enjten ose të premten mund të ketë një përgjigje se a mund të kthehen nxënësit në procesin mësimor.

“Të enjten ose të premten. Të gjitha këto duhet të bëhet me vendim të qeverisë. Jemi në kontakt me Ministrin e Shëndetësisë. Duhet ti diskutojmë edhe në mbledhjen e qeverisë. I pranishëm duhet të jetë edhe përfaqësuesi i Zyrës së Kryeministrit për shkak se ky proces ka kosto koxha të madhe financiare”.

Bajrami shtoi se organizimi i Provimit Shtetëror të Maturës do të bëhet më 12 nxënës në klasë.

“Mbajtja e provimit shtetëror të maturës do të bëhet me 12 nxënës me një klasë. Do të thotë që një klasë do të ndahet në dy apo tre pjesë. Domethënë që njëra pjesë e klasës të zhvilloj Gjuhë Shqipe, tjetri matematikë dhe pas një kohe të ndryshojnë”.

“Duhet të kemi rekomandimet e Institutit Kombëtar për t’u rikthyer. Kemi presion edhe nga prindërit që nëse nuk ka kushte të zbatohen edhe  rekomandimet IKSHPK-së të mos hapen shkollat”.

Konkurs Pune

Lexo më shumë