Arrestohen tre persona në Tiranë, mbanin 30 emigrantë të izoluar në një banesë

Arrestohen tre persona në Tiranë, mbanin 30 emigrantë të izoluar në një banesë

NULL NULL
4 months më parë

Policia e Tiranës ka arrestuar tre persona, mes të cilëve dy shtetas të huaj pasi mbanin në mënyrë të paligjshme dhe nën kërcënim në një banesë emigrantë.

Specialistët e Seksionit për Hetimin e Trafiqeve të Paligjshme në DVP Tiranë, në bashkëpunim me Sektorin e Forcës së Posaçme “Shqiponja”, dhe me Sektorin e Forcës Operacionale, zbuluan se në një banesë të përshtatur si hotel, në zonën e Laprakës së Tiranës, po mbaheshin të mbyllur rreth 30 persona, emigrantë të huaj. Ata organizuan dhe finalizuan operacionin “Just in time”, për goditjen e kësaj veprimtarie kriminale.

Në kuadër të këtij operacioni u bë arrestimi në flagrancë i shtetasve: M. K., 40 vjeç, banues në Tiranë, M. E., 26 vjeç, banues në Tarablos, Libi, dhe Z. D., 27 vjeç, banues në Casablanca, Marok, për veprat penale: “Ndihma për kalim të paligjshëm të kufijve”, “Shtrëngimi me anë të kanosjes ose dhunës për dhënien e pasurisë” dhe “Heqja e paligjshme e lirisë”.

Në banesën e shtetasit M. K., në katin e parë, të tretë dhe te katërt, shërbimet e Policisë kanë gjetur rreth 30 persona të shtetësive të ndryshme, kryesisht nga Lindja e Mesme, të cilët mbaheshin në këto dhoma, pa u lejuar të dilnin, duke ju marrë mjetet e komunikimit dhe duke i kërcënuar familjarët në vendet e origjinës, për kryerjen e pagesës së transportit të këtyre shtetasve, drejt vendit tonë.