Ambasadori Hargreaves viziton “Comoditan”, mahnitet me fabrikën dhe numrin e grave të punësuara (VIDEO)

Ambasadori britanik në Kosovë, Jonathan Hargreaves i ka bërë një vizitë fabrikës “Comodita” në Gjakovë, kompani kjo e cila po sfidon standardet e prodhimit dhe inovacionit në Kosovë.

Ambasadori tha se ishte i mahnitur nga fabrika e mbushur me makina moderne dhe produkte që flasin për artizanatin e kamotshëm të prodhimtarisë.

Hargreaves, gjatë turit që i bëri fabrikës, u takua me aksionarin Shkëlqim Devolli me bashkëpunëtorë, ndërsa u njoftua për së afërmi edhe me linjat e prodhimit, ku çdo ndalesë tregonte përkushtimin dhe inovacionin.

“Kam qenë në dyqanet e Comoditas, por këtu kisha mundësi edhe të shoh produktet por edhe mënyrën se si prodhohen”, tha ai për Klan Kosova.

I njëjti ishte i befasuar nga numri i grave të punësuara në kompani, gjë kjo e cila, sipas tij, ndodh rrallë në Kosovë.

“Numri i grave të punësuara këtu ishte i habitshëm, marrë parasysh nivelin e punësimit të grave në Kosovë”, shtoi ai.

Teksa foli për kualitetin që pa tek produktet, ai tha se diskutuan edhe për mundësitë e bashkëpunimit me tregun anglez.

“Comodita Home” është industria në të cilën rreth 2 mijë qytetarë janë në marrëdhënie pune. /Klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.